الحب ياجاهلٍ بالحب شوق وغـرام
عواطفٍ وسط روحك صار مسكانها
الحب ماهوب كلمة مثل باق الكلام
الحب يسكن قلـوب ابعـز ريعانهـا
الحب كم واحدن صابه برمي السهام
الحب كلمة كبيـرة باسـم عنوانهـا
الحب كم واحدن ساقه بجر الخطـام
كلمة لهـا وقـع بالعالـم وبازمانهـا
الحب ياصل ترا حتى قلوب الحمـام
من عشقها بالسما تكفـخ بجنحانهـا
الحب ياناس ماهو دوم برد وسـلام
كلمة كثير العـرب يعيـش نيرانهـا
الحب لا زاد حده صار عشق وهيـام
وتصير نفسك تعيش العمـر بجنانهـا
الحب فالقلب يبنى مثل بنـي الخيـام
الصبر مخطر وكثر الشـوق عمدانهـا
الحب ماهوب سلعة ياعرب تنتسـام
الحب كلمـة بهيضـة دوم باثمانهـا
الحب فيه الحلال وفيه أيضـاً حـرام
ونفسك عن اللي محرّم جوّد اعنانهـا
الحب يـزدان بالعفـة وبالاحتشـام
كالبسمة اللي تزين ابلمعـة اسنانهـا
الحب من دون حشمة ودك انّه عدام
مثل السفينة ليا مـن طـاح ربانهـا
أو مثل عفرا جميلة لولا عيب السنـام
ان كان غليت غلا مارخصت اثمانهـا
حبٍ على غير مبدا بعد صحوه ينـام
وناسه ترا ياعـرب سريـع نسيانهـا
وحبٍ على عزّ يبقى دوم في كل عام
ناسه مع الوقت ماتنـوي بهجرانهـا
الحب كلمة لها عشاق دوم انقسـام
شتان مابيـن صاحيهـا وجربانهـا
الحب مثل الحروب ابها خساير عظام
وابها غنايم بعد فـي وسـط ميدانهـا
وقبل انهي القاف انا بختم بقول السلام
سلام ياللي قـرا الصفحـة بقيفانهـا
الثلاثاء 15 يوليو 2008, 5:22 pm
